സുപീം കോടതി ചീഫ് ജസ്റ്റിസ് ദീപക് മിശ്രയ്ക്കെതിരെ പ്രതിപക്ഷം നല്കിയ ഇംപീച്ച്മെന്റ് നോട്ടീസ് രാജ്യസഭാ അധ്യക്ഷന് തള്ളി. ചട്ടങ്ങള് ലംഘിച്ചെന്ന് ചൂണ്ടിക്കാട്ടിയാണ് രാജ്യസഭാ അധ്യക്ഷന് വെങ്കയ്യ നായിഡു നോട്ടീസ് തള്ളിയത്. അറ്റോര്ണി ജനറല് അടക്കമുള്ള നിയമവിദഗ്ധരുമായി ആലോചിച്ചാണ് ഉപരാഷ്ട്രപതികൂടിയായ വെങ്കയ്യ നായിഡു ഈ തീരുമാനം എടുത്തത്.
എന്നാല് ഉപരാഷ്ട്രപതിയുടെ നടപടിയ്ക്കെതിരെ സുപ്രീംകോടതിയെ സമീപിക്കുമെന്ന് കോണ്ഗ്രസ് അറിയിച്ചു. എന്നാല് അത്തരമൊരു ഹര്ജിയുമായി കോണ്ഗ്രസ് സുപ്രീംകോടതിയെ സമീപിച്ചാല് അത് പരിഗണിക്കുക ചീഫ് ജസ്റ്റിസായിരിക്കും എന്ന സങ്കീര്ണമായ സാഹചര്യം നിലനില്ക്കുന്നു.
കോണ്ഗ്രസ് നേതാവ് ഗുലാം നബി ആസാദിന്റെ നേതൃത്വത്തില് ഏഴ് പ്രതിപക്ഷ പാര്ട്ടികാളാണ് ഇംപീച്ച്മെന്റ് നോട്ടീസ് നല്കിയത്. 71 എംപിമാര് നോട്ടീസില് ഒപ്പിട്ടിരുന്നു.
ഉത്തര്പ്രദേശിലെ മെഡിക്കല് കോഴ അഴിമതിയില് ദീപക് മിശ്രയുടെ പേര് പരാമര്ശിക്കപ്പെട്ടതാണ് ഇംപീച്ച്മെന്റിന് ആധാരമായി കോണ്ഗ്രസ് ഉയര്ത്തുന്ന പ്രധാന ആരോപണം. ഈ കേസില് യുപി ഹൈക്കോടതി ജഡ്ജിയെ സിബിഐ അറസ്റ്റ് ചെയ്തിരുന്നു. ചില ഇടനിലക്കാരെ അറസ്റ്റ് ചെയ്തപ്പോള് സുപ്രീംകോടതി ചീഫ് ജസ്റ്റിസുമായി ബന്ധപ്പെടുത്തി ചില മൊഴികള് അവര് നല്കുകയും ചെയ്തു.
പിന്നീട് ഈ കേസില് കോഴയില് ഉള്പ്പെട്ട കോളേജിന് അനുകൂലമായ വിധി സുപ്രീംകോടതിയില് നിന്നുണ്ടായതും ദീപക് മീശ്രയെ സംശയനിഴലിലാക്കി. ഈ കേസ് ജസ്റ്റിസ് ജെ.ചെലമേശ്വര് അധ്യക്ഷനായ ഭരണഘട ബെഞ്ചിന്റെ പരിഗണനയ്ക്ക് വിട്ടിരുന്നുവെങ്കിലും പിന്നീട് ചീഫ് ജസ്റ്റിസ് നേരിട്ട് ഇടപെട്ട് കേസ് മാറ്റിയിരുന്നു. ഇതിന് പിന്നാലെയാണ് ചീഫ് ജസ്റ്റിസിനെതിരെ കടുത്ത ആരോപണങ്ങളുമായി നാല് മുതിര്ന്ന ജഡ്ജിമാര് പത്രസമ്മേളനം വിളിച്ചത്.