തായ്ലാന്റില് ഗുഹയിലകപ്പെട്ട 12 കുട്ടികളെയും ഫുട്ബോള് കോച്ചിനെയും പുറത്തെത്തിക്കാന് ശ്രമം തുടരുന്നു. ഗുഹയില് സംഘത്തിനൊപ്പം തങ്ങുന്ന തായ് നാവികസേനയിലെ രണ്ട് മുങ്ങല് വിദഗ്ധര് കുട്ടികളെ നീന്തല് പരിശീലിപ്പിക്കാന് തുടങ്ങി. കഴിഞ്ഞ ദിവസം കുട്ടികള്ക്കാവശ്യമായ ഭക്ഷണവും വൈദ്യ സഹായവും എത്തിച്ചിരുന്നു.
ഗുഹയ്ക്കുള്ളിലെ ഇടുങ്ങിയ വഴികളില് വലിയ തോതില് വെള്ളവും ചളിയും കയറിയതിനാല് രക്ഷാപ്രവര്ത്തനം എളുപ്പമാകില്ലെന്ന് അധികൃതര് വ്യക്തമാക്കി. മഴക്കാലം ആരംഭിച്ചിട്ടേയുള്ളൂ. അത് നാലു മാസം നീണ്ടുനില്ക്കും.
ഈ അവസരത്തില് കുട്ടികളെ നീന്തല് പരിശീലിപ്പിച്ചാല് രക്ഷാപ്രവര്ത്തനം എളുപ്പത്തിലാകുമെന്നാണ് കണക്കുകൂട്ടുന്നത്. ഗുഹയിലെ വെള്ളം പമ്പ് ചെയ്ത് കളയാനുള്ള ശ്രമങ്ങളും പുരോഗമിക്കുന്നുണ്ട്. ഇത് കുട്ടികള് കുടുങ്ങിയിരിക്കുന്ന ഭാഗത്തേക്ക് കൂടുതല് വെള്ളം എത്തുന്നത് തടയാന് സാധിക്കുമെന്ന് നാവികസേന ആത്മവിശ്വാസം പ്രകടിപ്പിച്ചു.
