യു.പി.എ അദ്ധ്യക്ഷ സോണിയാഗാന്ധി ദ്വിദിന സന്ദര്‍ശനത്തിന് ഞായറാഴ്ച തിരുവനന്തപുരത്തെത്തും. സംസ്ഥാന സര്‍ക്കാരിന്റെ ആരോഗ്യ കിരണം, ഭൂരഹിതരില്ലാത്ത കേരളം പദ്ധതികളുടെ ഉദ്ഘാടനമാണ് സോണിയ പങ്കെടുക്കുന്ന പ്രധാന പരിപാടികള്‍.
ഞായറാഴ്ച ഉച്ചയ്ക്ക്‌ശേഷം 3.30 ന് സ്വകാര്യ വിമാനത്തില്‍ വ്യോമസേനയുടെ ടെക്‌നിക്കല്‍ ഏരിയായില്‍ എത്തിച്ചേരുന്ന സോണിയാഗാന്ധി 3.50 ന് നെയ്യാര്‍ഡാമില്‍ രാജിവ് ഗാന്ധി സെന്റര്‍ ഫോര്‍ ഡെവലപ്‌മെന്റ് സ്റ്റഡീസിന്റെ ട്രയിനിംഗ് കം റിസര്‍ച്ച് കോംപ്ലക്‌സ് ഉദ്ഘാടനം ചെയ്യും. തുടര്‍ന്ന് 4.55 ന് തിരുവനന്തപുരം നഗരത്തില്‍ പാളയത്ത് മുന്‍ മുഖ്യമന്ത്രി ആര്‍.ശങ്കറുടെ പ്രതിമ അനാച്ഛാദനം നിര്‍വ്വഹിച്ച് സെനറ്റ് ഹാളിലെ സമ്മേളനത്തില്‍ പങ്കെടുക്കും. ആരോഗ്യ കിരണം പദ്ധതിയുടെ ഉദ്ഘാടനം വൈകുന്നേരം 5.45 ന് കനകക്കുന്ന് കൊട്ടാരത്തിലാണ്.
സെപ്തംബര്‍ 30 തിങ്കളാഴ്ച രാവിലെ 11.45 ന് ഭൂരഹിതരില്ലാത്ത കേരളം പദ്ധതി സെന്‍ട്രല്‍ സ്റ്റേഡിയത്തില്‍ സോണിയാഗാന്ധി ഉദ്ഘാടനം ചെയ്യും. 12.45 ന് ആക്കുളം ദക്ഷിണ വ്യോമ കമാന്‍ഡിനു സമീപം രാജീവ് ഗാന്ധി സെന്റര്‍ ഫോര്‍ ബയോടെക്‌നോളജിയുടെ രണ്ടാം കാംപസിന്റെ ശിലാസ്ഥാപനം നിര്‍വ്വഹിച്ചശേഷം 1.40 ന് പ്രത്യേക വിമാനത്തില്‍ അവര്‍ മൈസൂറിലേക്ക് പോകും.
