ഷൊര്ണ്ണൂര് എം.എല്.എ പി.കെ ശശിക്കെതിരെ ഡി.വൈ.എഫ്.ഐ വനിതാ നേതാവിന്റെ ലൈംഗിക പീഡന പരാതി. എം.എല്.എയ്ക്ക് എതിരെ വനിതാ പിബി അംഗത്തിനും സംസ്ഥാന സെക്രട്ടറിക്കും സെക്രട്ടേറിയറ്റിലെ ചില പ്രമുഖ നേതാക്കള്ക്കുമാണ് യുവതി പരാതി നല്കിയിരുന്നത്. ഇതില് നടപടിയുണ്ടാകാത്തതിനെ തുടര്ന്ന് ജനറല് സെക്രട്ടറി സീതാറാം യച്ചൂരിക്കു പരാതി ഇമെയിലായി അയച്ചു. തുടര്ന്ന് സംഭവം അന്വേഷിച്ച് നടപടിയെടുക്കാന് പാര്ട്ടി കേന്ദ്ര നേതൃത്വം സംസ്ഥാന നേതൃത്വത്തിന് നിര്ദേശം നല്കി.
പരാതി രണ്ടംഗ സംസ്ഥാന സെക്രട്ടറിയേറ്റ് ഉപസമിതി അന്വേഷിക്കണമെന്നാണ് നിര്ദേശം. സമിതിയില് ഒരു വനിതാ അംഗത്തെ ഉള്പ്പെടുത്തണമെന്നും നിര്ദേശമുണ്ട്. ഇന്ന് ചേരുന്ന പാലക്കാട് ജില്ലാ കമ്മറ്റി യോഗം വിഷയം ചര്ച്ച ചെയ്തേക്കും.
അതേസമയം ഏത് അന്വേഷണവും നേരിടാന് തയ്യാറാണെന്നും പരാതിയെക്കുറിച്ച് താന് അറിഞ്ഞത് മാധ്യമങ്ങളിലൂടെയാണെന്നും പി.കെ.ശശി പ്രതികരിച്ചു.
