അഭൂതപൂര്‍വ്വമായ ഒരു നടപടിയില്‍ കല്‍ക്കട്ട ഹൈക്കോടതിയിലെ ജഡ്ജി സി.എസ് കര്‍ണനെതിരെ സുപ്രീം കോടതി അറസ്റ്റ് വാറന്റ് പുറപ്പെടുവിച്ചു. കര്‍ണനെതിരെയുള്ള കോടതിയലക്ഷ്യ കേസില്‍ മാര്‍ച്ച് 31-ന് നേരില്‍ ഹാജരാക്കുന്നതിനാണ് വാറന്റ്. ജാമ്യത്തോടെയാണ് വാറന്റ്.

ഒരു ഹൈക്കോടതി ജഡ്ജിക്കെതിരെ സുപ്രീം കോടതി അറസ്റ്റ് വാറന്റ് പുറപ്പെടുവിക്കുന്ന ആദ്യ സംഭവമാണിത്. ചീഫ് ജസ്റ്റിസ്‌ ജെ.എസ് ഖേഹറിന്റെ നേതൃത്വത്തിലുള്ള ഏഴംഗ ബഞ്ച് ആണ് കോടതിയില്‍ ഹാജരാകാത്ത കര്‍ണ്ണന്റെ നടപടിയില്‍ അതിയായ അമര്‍ഷം രേഖപ്പെടുത്തി പശ്ചിമ ബംഗാള്‍ ഡി.ജി.പിയ്ക്ക് വാറന്റ് നടപ്പിലാക്കാന്‍ നിര്‍ദ്ദേശം നല്‍കിയത്.   

ഉച്ചഭക്ഷണ പദ്ധതിയിലെ വിദ്യാര്‍ഥികള്‍ക്ക് ആധാര്‍ നിര്‍ബന്ധമാക്കി കേന്ദ്ര മാനവ വിഭവ ശേഷി മന്ത്രാലയം വിജ്ഞാപനം പുറപ്പെടുവിച്ചു. ജമ്മു കശ്മീര്‍, മേഘാലയ, അസ്സം എന്നീ സംസ്ഥാനങ്ങള്‍ ഒഴികെ രാജ്യത്ത് എല്ലായിടത്തും ഇത് ബാധകമായിരിക്കും. ഫെബ്രുവരി 28-നാണ് വിജ്ഞാപനം പുറപ്പെടുവിച്ചത്.

പദ്ധതിയില്‍ ജോലി ചെയ്യുന്ന പാചകക്കാര്‍ക്കും ആധാര്‍ നിര്‍ബന്ധമായിരിക്കും. ആധാര്‍ നമ്പര്‍ എടുക്കാത്തവര്‍ക്ക് ജൂണ്‍ 30 വരെ സമയം നല്‍കിയിട്ടുണ്ട്.

ദേശീയഗാനത്തിന്റെ ആലാപനം‌ സര്‍ക്കാര്‍ ഓഫീസുകളിലും കോടതികളിലും നിയമസഭകളിലും നിര്‍ബന്ധമാക്കണമെന്ന് ആവശ്യപ്പെട്ടുകൊണ്ട് സമര്‍പ്പിച്ച ഹര്‍ജി സുപ്രീം കോടതി തള്ളി. ബി.ജെ.പി വക്താവ് അശ്വിനി ഉപാധ്യായ നല്‍കിയ ഹര്‍ജിയിലാണ് ജസ്റ്റിസുമാരായ ദീപക് മിശ്ര, ആര്‍. ഭാനുമതി, എസ്.എം മല്ലികാര്‍ജ്ജുന ഗൗഡ എന്നിവരുടെ ഉത്തരവ്.

അതേസമയം, പ്രവൃത്തി ദിവസങ്ങളില്‍ സ്കൂളുകളില്‍ ദേശീയഗാനം ആലപിക്കണമെന്ന ആവശ്യം കോടതി അംഗീകരിച്ചു.

ചലച്ചിത്രം, വാര്‍ത്താചിത്രം, ഡോകുമെന്ററി എന്നിവയില്‍ തിരക്കഥയുടെ ഭാഗമായി ദേശീയഗാനം ആലപിക്കുമ്പോള്‍ കാണികള്‍ എഴുന്നേറ്റു നില്‍ക്കേണ്ടതില്ലെന്നു സുപ്രീം കോടതി വ്യക്തമാക്കി. ജസ്റ്റിസുമാരായ ദീപക് മിശ്ര, ആര്‍. ഭാനുമതി എന്നിവരുടെ ബഞ്ചാണ് ഇത് വിശദമാക്കിയത്.

അഭൂതപൂര്‍വ്വമായ നടപടിയില്‍ കല്‍ക്കട്ട ഹൈക്കോടതി ജഡ്ജി സി.എസ് കര്‍ണന് സുപ്രീം കോടതി കോടതിയലക്ഷ്യ നോട്ടീസ് അയച്ചു. കോടതിയലക്ഷ്യ നടപടികള്‍ ആരംഭിക്കാതിരിക്കാന്‍ എന്തെങ്കിലും കാരണമുണ്ടെങ്കില്‍ നേരില്‍ ഹാജരായി ബോധിപ്പിക്കാനും നിയമപരവും ഭരണപരവുമായ ചുമതലകളില്‍ നിന്ന്‍ വിട്ടുനില്‍ക്കാനും ചീഫ് ജസ്റ്റിസ്‌ ജെ.എസ് ഖേഹറിന്റെ നേതൃത്വത്തിലുള്ള ഏഴംഗ സുപ്രീം കോടതി ബെഞ്ച്‌ അദ്ദേഹത്തോട് ഉത്തരവിട്ടിട്ടുണ്ട്.